Vieiros

O secretario xeral do Eixo Atlántico, Xoán Vázquez Mao, manifestou este luns, en declaracións á axencia de noticias Lusa, que "está a ser estudada unha solución para compensar" os taxistas recentemente multados na Galiza.

Vázquez Mao dixo tamén ter coñecemento de que foron dadas instrucións aos axentes da Garda Civil para que fagan unha "interpretación flexíbel" da lexislación que impide a actividade dos taxistas portugueses no Estado Español.

O caso, denunciado a semana pasada polo presidente de Antal, "colleu de sorpresa" as autoridades españolas que, segundo o responsábel do Eixo Atlántico, se ofreceron "de inmediato" para resolver a cuestión, malia "non cuestionaren a actuación dos axentes".