Vieiros

Cinco días despois das eleccións presidenciais en Irán, continúan as protestas nas rúas, desenvolvidas por milleiros de opositores ao réxime de Ahmadinejad, seguidores de Mousavi, que seguen a denunciar a fraude electoral. Durante as protestas faleceron, polo menos, sete persoas.

Por outra banda, as rúas da capital, Teherán, tamén están ocupadas polos seguidores do presidente, que se manifestan para amosarlle o seu apoio a Ahmadinejad. Había anos que este país de Oriente Medio non vivía unha situación de tanta tensión política. Mais, obviando por completo a crise que vive o país que dirixe, Ahmadinejad quixo facer un aceno de normalidade, reuníndose en Moscova co presidente ruso, Dmitri Medvédev, esta terza feira.

Por outro lado, o Consello de Gardiáns da Revolución negouse a recontar os votos das eleccións da pasada sexta feira, como pedían os opositores, mais si accedeu a volver a contabilizar unha parte deles, os de aquelas urnas nas que fora denunciada a fraude, nunha concesión ao dirixente opositor Mousavi. Porén, este volveu insistir en que, a pesar do aceno do Consello, os comicios seguían sen ter validez para el.

Obama négase a mediar, a UE pide unha investigación da suposta fraude
Do outro lado do Atlántico, o presidente dos EUA, Barack Obama, evitou opinar publicamente sobre a lexitimidade dos resultados electorais do Irán, mais declarouse "fondamente preocupado" pola situación do país, e condenou a violencia empregada contra os manifestantes da oposición. Porén, os ministros de Exteriores da UE pedíronlle a Irán que investigue as denuncias de fraude.