Vieiros

Tal e como estaba previsto, o Partido Comunista do Nepal (PCN), de corte maoísta, gañou as eleccións do pasado 10 de abril, segundo os resultados completos do escrutinio, difundidos esta quinta feira pola Comisión Electoral.

"A primeira reunión da Asemblea Constituínte porá fin á monarquía", afirmou o líder do PCN, Pushpa Kamal Dahal, coñecido como Prachanda, pouco despois de se confirmar que conseguiran 217 dos 601 escanos da Asemblea Constituínte, encargada de redactar unha nova Constitución e proclamar a república.

"Non podemos renunciar a todo tipo de violencia, mais acabaremos coa violencia reaccionaria", asegurou, ademais, sen ofrecer maior explicación, e agregou: "Agardo que EUA cambie a súa política". O país norteamericano mantén o PCN na lista de grupos terroristas.

Os maoístas e o resto dos partidos asinaron a paz o 21 de novembro de 2006, tras dez anos dunha guerra civil que deixou 13.000 mortos, e gobernan xuntos dende abril de 2007 baixo a atenta mirada da misión de paz da ONU.