Vieiros

A primeira fin de semana de agosto, sen dúbida a máis festeira do país, preséntase tamén moi recomendábel para todos os folkies. Mágoa, porén, que non se poidan multiplicar para poderen asistir aos catro grandes eventos que se desenvolven espallados por toda a xeografía do país.

Dende o xoves, Moaña é a sede do XXIII Festival Intercéltico do Morrazo, catro días con todo tipo de propostas, entre música, contacontos e obradoiros. O venres, o teatro de Codia e Miolo, a música de Blima, Serra-lhe Aí e Korrontzi abren o festival propiamente dito. O sábado é a quenda de Pé de Boi, Quempallou e Mercedes Peón, pola noite, e as charanga Lembranzas da Ría, polo día. O domingo pechan os espectáculos Xochilmica e Oskorri.

Outra pura festa celta é a que se celebra en Bretoña, parroquia da Pastoriza onde se cre que tivo a súa sé a mítica Britonia, terra de Mailoc. O Lugnasad desenvólvese o venres 3, coa participación de druídas, contadores de lendas e as actuacións de música folc de Linho do Cuco, Stranniki ou Cantigas e Frores.

Non moi lonxe de Bretoña celébrase un dos festivais máis míticos do país, o de Pardiñas, en Guitiriz. Vinte e oito anos de historia levan até o lugar a grupos como Ghaita de pedra, Os Cempés ou Elzef. Organizado pola asociación cultural Xermolos, desenvólvese entre o sábado e o domingo, con música, unha mostra de instrumentos tradicionais e un obradoiro de baile.

E en Zas, o sábado é o día da Festa da Carballeira, que chega á súa edición número 24. Unha xornada con moita e boa comida e, por suposto música, con representantes como Pepe Vaamonde Grupo, Sharon Shanon, Lhan de Cubel, Radio Cos, Xiradela ou Castro de Meda.

Máis información sobre estas e moitas outras celebracións en Vieiros Festas.