Vieiros

As mostras de solidariedade cos 61 traballadores de oficinas I+B que a Xunta quere despedir a final de ano non cesan. Unha das máis simbólicas chega dende o Eume. Dende esta bisbarra, o Consello de Anciáns de Xestoso e a asociación de mulleres desta parrioquia do municipio de Monfero fixeron público un comunicado no que lle exixen á Xunta que reconsidere a súa intención de desmantelar estes servizos.

Na nota, os anciáns, moitos deles alumnos da Universidade Rural (dependente da Uned Senior) salientan o “extraordinario” traballo do equipo comarcal da oficina das Pontes e valoran a súa especial dedicación á dinamización de parroquias rurais tradicionalmente esquencidas. En especial fan fincapé nos seminarios de autoestima, saúde e prevención da violencia de xénero. Afirman que se dirixirán ao Goberno para mostrarlle o seu total desacordo coa supresión deste tipo de servizos públicos.