Vieiros

O desmantelamento das oficinas comarcais de Igualdade e Benestar postas en marcha polo bipartito vai comezar nas vindeiras semanas. O xerente do consorcio, Roberto Rodríguez, comunicoulle este mércores a representantes de traballadores que cara a fin de ano se suprimirán os equipos que levan adiante o Plan de Igualdade e o de Apoio ás Familias.

Segundo lles explicou este cargo político, a decisión do Goberno é firme e non hai vontade de negociar. Nin a Secretaría Xeral de Familia e Benestar (encadrada na Consellaría de Traballo), nin a de Igualdade (que depende directamente do presidente) contan cos 32 técnicos que levan perto de dous anos traballando nestas áreas. Aínda que dende a Consellaría de Traballo e Benestar prometeran hai dúas semanas estudar coa Fegamp unha posíbel continuidade do persoal, segundo puido saber Vieiros, a decisión de non destinar diñeiro a estes servizos públicos xa estaba tomada. Tamén semella máis que probábel que corran a mesma sorte 29 técnicos do Plan de Apoio á Infancia e á Adolescencia, segundo lle explicaron dende a Xunta aos representantes sindicais.

A comunicación oficial prodúcese logo dunha grave polémica polas declaracións da secretaria xeral de Familia no Parlamento. O pasado 23 de outubro, Susana López Abella xa deixaba entrever que o Goberno non contaba coas oficinas I+B e arremetía contra o persoal, ao que acusaban de seren “enchufados” e de estar nos seus postos sen ter pasado ningún proceso de selección. As graves declaracións foron recollidas con grandes titulares por boa parte da prensa.

Unha acusación falsa que abría o camiño ao desmantelamento?

As palabras da alto cargo produciron unha forte reacción das traballadoras que demostraron a existencia de concursos públicos legais e transparentes. Máis aló, pediron unha rectificación pública de López Abella e iniciaron accións legais por difamación. Case dúas semanas despois, a propia Consellaría de Traballo e Benestar viuse na obriga de aclarar que os procesos de selección foran regulamentarios e que en ningún momento quixeran cuestionar a honorabilidade do persoal das oficinas. Porén, a denuncia contra López Abella segue adiante, ao considerar o persoal que non houbo unha rectificación real da propia secretaria.

Nas oficinas I+B están convencidos de que as continuas acusacións de “enchufismo” buscaban xustificar socialmente a abolición destes postos laborais. Para eles, o refrán de “difama que algo queda” cumpriuse á perfección neste caso. Aínda que dende antes do verán, intentaron reunirse coa secretaria xeral de Igualdade, Marta González, e con López Abella para saber se ía haber continuidade dos programas, as portas de San Caetano mantivéronse pechadas.

Cal era o obxectivo do Plan Galego de Igualdade e do de Apoio ás Familias?

-Plan de Igualdade: O programa, no que traballaban 19 profesionais (12 técnicos de igualdade, seis avogadas e unha coordenadora), nacía para fomentar a visibilización e participación da muller. Por vez primeira tamén, a oferta incluía asesoramento xurídico gratuito a mulleres de concellos (maioritariamente rurais) onde non existe ningún tipo de recurso. Mais o traballo tamén se dirixía a ducias de centros escolares públicos onde os equipos se encargaban da educación en igualdade dos máis pequenos.

-Plan de Apoio á Familia:Composto por doce técnicos e unha coordinadora, o programa dirixía unha rede conxunta coas educadoras familiares de todo o país. Entre as súas principais tarefas estaba a elaboración dun programa marco que fose aplicábel en todo o país e que servise para mellorar os recursos dos municipios con menos posibilidades económicas.

Como foi o acceso aos postos de traballo dos despedidos?

Ben contrario do que tiña dito López Abella, o proceso de contratación temporal dos equipos de Igualdade e Familia foi máis que completo. As traballadoras accederon ao seu posto logo de superar un concurso composto de dous exames e onde non había nin entrevistas persoais nin méritos previos. Os procesos foron publicados no DOG (24/10/2007) e na propia páxina do Consorcio. No caso dos traballadores de Infancia e Adolescencia a súa contratación fíxose botando man das listas de agarda regulamentarias.

• O Consorcio paralizarase o día 24 en apoio dos despedidos