Vieiros

Por vez primeira, o incremento do número de parados en Galiza superou ó do Estado Español. Mentres, que o ascenso estatal foi do 2,2%, en Galiza os desempregados foron en setembro un 2,58% máis que no anterior mes de agosto. Así o revelan os datos do Instituto Nacional de Emprego (Inem) ofrecidos polo Ministerio de Traballo.

En concreto, o número de persoas que perderon o seu emprego neste último mes ascendeu a 5.224, de xeito que os desempregados en Galiza superaron xa a barreira das 200 mil persoas (exactamente 200.465). O incremento con respecto a setembro de 2008 é do 27,82%, o que supón 43.631 persoas máis inscritas nas oficinas do Inem neste último ano.

Menos persoas a cotizar
Ademais, o número de afiliados á Seguridade Social en Galiza baixou en 8.068 persoas no pasado mes de setembro, o que equivale a un descenso de 0,77%. Neste caso, a caída tamén é superior á do Estado Español (0,37%). Así, a día de hoxe, hai no noso país 43.011 persoas menos dadas de alta, tamén segundo os datos publicados polo Ministerio de Traballo.

O réxime agrario foi o único que rexistro un pequeno incremento no número de cotizantes en setembro, con 579 máis (13,53%), mentres que o resto de réximes experimentaron un descenso no total de persoas dadas de alta.

• En agosto: Logo de catro meses de baixadas, o paro volve repuntar en Galiza
• En xullo: O paro cae en 7.381 persoas, malia ser superior que hai un ano
• En xuño: O paro baixa en Galiza un 3,51%, pero segue sendo maior que hai un ano