Vieiros

Decenas de miles de persoas, 40 mil segundo a organización, participaron o venres na manifestación convocada por colectivos sociais, profesionais e concellos da comarca na defensa da capitalidade de Pontevedra.

Co lema "Pontevedra é capital, anulación do decreto xa", os manifestantes saíron arredor das nove da noite da Praza da Ferraría en dirección á delegación da Xunta na cidade, onde chegaron unha hora despois. A protesta serviu para expresar o rexeitamento á decisión do Goberno de crear unha delegación en Vigo.

O alcalde de Pontevedra, Miguel Anxo Fernández Lores, asegurou que "hai practicamente unanimidade na sociedade pontevedresa organizada" sobre esta polémica. Para o rexedor municipal, trátase dunha "agresión sen precedentes ao status de capital" de Pontevedra, polo que animou a defendelo "con unllas e dentes".

Sobre as dez da noite, o decano do Colexio de Avogados de Pontevedra, Eloi Artime, leu o manifesto en que criticou a "falta de madurez política da Xunta" por unha decisión que cualificou como o "atentado máis claro" contra a capitalidade de Pontevedra polo decreto de creación das 'superdelegacións'.

Desta volta, a Policía Local non deu cifras de asistencia, senón que ofreceu unha estimación da superficie ocupada polos manifestantes, de 13.567 metros cadrados.