Vieiros

Economía democrática
O consello de suburbio é agora unha fonte de recursos para a comunidade. As mulleres poden achegarse e pedir crédito para amañar a casa, organizar unha voda ou funeral, gastos médicos ou para un negocio. Os cartos aos que poden acceder grazas ao consello de suburbio e que en realidade xestiona o consello comunitario (o organismo que agrupa aos 10 consellos de suburbio existentes) son maiores cós de cada grupo de aforro individual e tamén poden chegar a persoas que estean en situación de especial necesidade.

Estes días é o meu traballo avaliar o seu funcionamento e avances agora que funcionan de forma independente, con apoio mínimo do persoal de PDI. No Consello de Suburbio de Paduvai Nagar tratan cuestións de infraestrutura, a distribución de material escolar ás nenas e nenos e logo teñen dúas solicitudes de crédito, unha para un negocio de venda de saris e a outra para mercar unha máquina de coser. As dúas mulleres explican a súa situación, fanlles as preguntas correspondentes (grupo de aforro ao que pertencen, estado dos seus créditos co grupo, que será logo comprobado) e explican o procedemento (interese, prazo de devolución, etc) para o crédito do Consello. A resolución comunicarase na próxima xuntanza. Alédame ver ás mulleres xestionar a economía de xeito democrático e solidario.

Hoxe vin...
Un home varrendo a rúa diante da súa casa. Un rapaz lavando o seu prato. Unha muller xogando con dous homes ao karom. Casas sólidas e resistentes. Un rapaz discapacitado coa súa cadeira de rodas. E ao fondo Malakottai, o templo que preside Tiruchy e que indica que o tempo do cambio é chegado.

Crónicas anteriores:

• "Durante estes días decateime do moito máis fácil que me resulta o entendemento coas feministas do sur"(1)
• Fai falta que escoite moita xente máis(2)
• A interferencia(3)
• Aquí todo o mundo casa antes dos 25 e se non o fas aí quedaches(4)
• Reconciliarme con esta costa que agora semella tan calma(5)
• Non só os cartos(6)
• Actividades altamente perigosas(7)
• Conexións(8)
• O traballo que custa ser rebelde(9)
• De culebrón, cinema e documental(10)
• Vivía sometida a guerra no seu fogar(11)
• Definitivamente, as cousas cambian(12)