Vieiros

O primeiro ministro portugués, José Sócrates, presentou esta quinta feira unha serie de medidas de axuste encamiñadas a recortar nuns dous mil millóns de euros o déficit público do país, até o 4,6% do PIB en 2011 en troques do 5,1% estimado anteriormente

"O vindeiro anos imos reducir o déficit ao 4,6%", declarou Sócrates após a reunión do Consello de Ministros que estudou o novo paquete de austeridade para acelerar o saneamento das finanzas públicas, reforzar a súa credibilidade nos mercados e cumprir coas exixencias da UE.

O mandatario do PS reafirmou que o seu goberno aposta por un déficit do 7,3% do PIB este ano, mellorando nun punto porcentual a súa anterior previsión do 8,3%. En 2009, o déficit de Portugal marcou a marca histórica do 9,4%.

Impostos extraordinarios
Entre as medidas, Sócrates anunciou un alza dun punto no IVE (do 20% ao 21%), a redución dos salarios dos empregados públicos e un recorte de gastos do Estado. Un imposto extraordinario do 1% ou o 1,5% será aplicado aos salarios segundo o seu nivel de ingresos. O imposto ás ganancias das grandes empresas superiores a dous millóns de euros pasará do 25% ao 27,5%.

"Estas medidas suplementarias son fundamentais para defender a nosa economía, garantir o seu financiamento e reforzar a nosa credibilidade nos mercados internacionais, así como para defender a Europa e a zona euro", declarou Sócrates, que pactou o plan co xefe da oposición, Pedro Passos Coelho, líder do conservador PSD.


Máis información:

• RTP: José Sócrates revela pacote para "ano e meio"

• Público: Cortes vão afectar mais os bolsos dos portugueses do que o previsto 

• Expresso: Especial 'Aumento de impostos'

• Jornal de Notícias: As 17 medidas para diminuir buraco nas contas do Estado

• Diário de Notícias: Governo promete nova reforma do mercado laboral 

• Correio da Manhã: Bolsa nacional abre no vermelho