Vieiros

'EIDOS retomados, xesteiras esguías, xabres nos cavorcos, stones íntimas, e as flores
que agroman nas gangs, caureis espesos, morrisseys extraviados, e xorden vieiros
en costiñas radiantes, en cumes sollíos, nos smiths sombrizos, nos castiñeiros
antergos, nos devanceiros heterodoxos, nos cramps elegantes, na fondura da dor,
nas chuvias sobre os lobos, e ouvea o vento, e perdemos as abrairas nos camiños,
e as hedras ruben, e habítannos as aguias, os sinais penumbrosos, os freixos desnortados,
as nogueiras irreverentes, e a noite é tan mesta e tan profunda…!'

Lucía Novas (Bueu, 1979), gañadora do último Premio de Poesía Johan Carballeira, achéganos, co seu bo facer na poesía paisaxística, un seu poema co que retoma Os Eidos de Novoneyra para homenaxear a figura deste Día das Letras. As xestas, castiñeiros e lobos novoneyrianos conflúen na súa composición cos novos morrisseys ou smiths, nunha demostración da riqueza léxica e poderosas imaxes que habitan a súa obra.

Licenciada en Filoloxía Galega, é acredora de diferentes premios literarios, colleitados dende ben nova, como o Minerva de poesía 1996 e 1997, o Premio Concello de Carral (Epiderme de Estío), o Premio Universidade de Vigo de poesía 2000, ou o Faustino Rey Romero, entre outros. A maiores, ofrécenos a súa Fragmentariedade Conceptual, unha composición que veu a luz na Revista Grial e da que gusta especialmente. Súmase así ás Voces en Movemento do Especial das Letras 2010, coa que Vieiros rende a súa homenaxe a Uxío Novoneyra.


Podes volver ler aquí os Especiais das Letras dos últimos anos:

• No 2009: Ramón Piñeiro. Día das Letras 2009
• No 2008: Álvarez Blázquez. Unha luzada de estrelas
• Especiais do Día das Letras dende o ano 1996 e ate o 2007