Vieiros

Colectivos sociais de Compostela pretenden organizar durante o mes de maio unhas festas populares como alternativa ás festas da Ascensión que se celebran na cidade. Varias organizacións consideran que os festexos non responden ás demandas do asociacionismo e considéranas "unha españolada" ou "un estrago de diñeiro".

Por iso, propoñen que, do 7 ao 23 de maio, se artellen unhas Festas Populares "dende abaixo, descentralizadas e espalladas polos barrios", de xeito que respondan "aos intereses e necesidades da veciñanza, participativas e colectivas".

Todas as actividades irán agrupadas nun cartaz ou tríptico coa marca "Festas Populares 2010", ás que se poden sumar as programacións que xa teñan previstas colectivos que achen o proxecto interesante. Ademais, esa marca común acompañará os carteis de actividades organizadas por cada asociación.

Entre as actividades que se propoñen están concertos, cursos, exposicións, obradoiros, xantares ou debates, de xeito que se poida constituír un programa o máis variado posíbel. Cada colectivo participante deberá facer unha pequena achega económica para financiar a edición dos materiais. Xa forman parte da iniciativa unha ducia de asociacións compostelás.