Vieiros

A Construtora Casas Novas, propiedade do presidente da Cámara de Comercio de Pontevedra, Ricardo Mirón, comunicou ao persoal a súa intención de pechar de inmediato, para o que despedirá os 51 traballadores. En suspensión de pagos dende o pasado outubro, presenta agora un novo ERE con extinción de contrato para todo o cadro de persoal (24 xa estaban sumidos nun expediente de regulación de emprego).

A empresa propón agora a disolución definitiva, o que tamén levarían canda si a anulación dos contratos das tres obras que aínda ten en marcha (en Pontevedra, Allariz e Cenlle). O Xulgado do Mercantil Número 1 de Pontevedra terá agora que pronunciarse sobre a aceptación a trámite desta opción, tendo en conta que os administradores concursais aínda non resolveron o informe do concurso anterior.

Os sindicatos sospeitan da insolvencia de Mirón
A intención de Casas Novas é alegar falta de liquidez e declararse insolvente, de xeito que sexa o Fondo de Garantía Social (Fogasa) quen asuma as indemnizacións dos traballadores. Porén, no mellor dos casos, este organismo abonará 20 días por ano traballado a cada un dos traballadores, cando o empresario tería que abonar o dobre polos despedimentos.

“Foi un anuncio unilateral e que chega de repente”, asegura o responsábel da CIG-Construcción, Xaquín Agulla, quen explica que a intención de Mirón é a de declararse insolvente. “Non nos cremos o da insolvencia”, di, “a súa estratexia é liquidar Casas Novas para salvar a outra empresa, a promotora inmobiliaria Os Regos, a onde sospeitamos que derivaron todos os cartos”.

Os traballadores xa convocaron unha folga para o vindeiro mércores para exixir os seus dereitos e adiantan que non permitirán “que un representante empresarial como Ricardo Mirón faga o que queira sen consecuencias para o seu prestixio”.