Vieiros

Vencellar o compromiso co medio ambiente co salario. Esa é a decisión dunha empresa oscense, Gráficas Huesca, quen decidiu pagar 50 euros máis ao mes os traballadores que vaian ao choio en bicicleta.

A dirección desta compañía quere así sensibilizar aos seus empregados co medio ambiente e suma esta iniciativa a outras tantas encamiñadas a fomentar a sustentabilidade ambiental das súas actividades, como unha inversión feita para promover o aforro de auga na empresa ou outra destinada a minimizar a xeración de residuos.

Os traballadores acolleron moi positivamente o proxecto, se ben aínda non moitos se decidiron a deixar o coche na casa. Explican que non é doado nunha cidade tan saturada de vehículos e con tan mal tempo. Porén, consideran a cuestión económica un efectivo reclamo.