Vieiros

"Todos estamos de acordo na necesidade de crear unha nova regulación europea do mercado do leite para substituír o sistema de cotas". Esta foi a conclusión que o ministro de Agricultura francés, Burno Le Maire, ofreceu do cumio do leite que este luns reunía en Bruxelas aos estados para abordar a crise do sector leiteiro.

Ao remate da xuntanza, Le Maire explicou que "hai unha grande vontade" por parte dos países para avanzar na liña do consenso, mesmo coa Comisión Europea e resumiu nos seguintes catro puntos a declaración de intencións nacida nesta reunión. Os gobernos reclaman a creación dun sistema de supervisión do mercado lácteo europeo para ter unha información máis transparente que permita tomar "as mellores decisións" a escala europea. Ademais, piden melloras nas relacións entre produtores e industria, para que sexan máis equilibradas. Tamén solicitan a mellora dos instrumentos xa existentes, como o almacenamento privado para determinados produtos; e a creación de novos instrumentos a longo prazo para produtos como a manteiga e o leite en po, que permitan a estabilización do seu prezo.

Con todo, como estaba previsto, non se adoptaron novas medidas inmediatas que procuren unha solución a curto prazo para a crise do sector. O obxectivo desta declaración, recoñeceu o ministro francés, "é enviar un sinal político claro" aos produtores.

• Anterior: Cumio do leite en Bruxelas, sen grandes expectativas