Vieiros

As familias e empresas que se declararon en concurso de acredores (suspensión de pagos e crebas) ascenderon a 106 durante o segundo trimestre do ano, o que supón un incremento do 47,2% respecto ao mesmo período de 2008.

Segundo a Estatística do Procedemento Concursal publicada polo Instituto Nacional de Estatística (INE), en total foron 102 as empresas e familias que se viron obrigadas a declarárense en concurso de acredores e o fixeron de xeito voluntario e noutras catro ocasións o concurso foi necesario. Ademais, o número de familias en concurso foi de 27 entre abril e xuño, mentres que as empresas concursadas sumaron 79 (66 Sociedades de Responsabilidade limitada; oito Sociedades Anónimas; e cinco persoas físicas).

Por provincias, Pontevedra rexistrou un total de 43 declaracións de suspensión de pagos ou creba, seguida pola Coruña (33) e Ourense (22). En Lugo, catro empresas e outras tantas familias pasaron por este procedemento.

No Estado Español
Galiza é a quinta comunidade co maior número de debedores. Superan a nosa cifra Cataluña, Comunidade Valenciana, Madrid e Andalucia, que encabezan o listado. Mentres, á cola sitúanse Ceuta e Melilla, A Rioxa ou Estremadura. No conxunto do Estado o número de empresas e persoas que se declararon en concurso de acredores acadou a cifra de 3.285 no primeiro semestre, o triplo que no mesmo período de 2008, logo de marcar un novo máximo entre abril e xuño.

Xa no segundo trimestre do ano, foron 315 o número de empresas e familias en concurso, é dicir, un 253,9% máis que no mesmo período de 2008.