Vieiros

As reaccións ao anunciado Plan Lácteo non se fan agardar, e os socialistas galegos xa cualificaron este proxecto como "o Plan de Abandono Obrigado". A portavoz de Agricultura do PSdeG, Sonia Verdes, acusa o presidente da Xunta, Núñez Feijoo, de condenar ao peche a máis de catro mil explotacións gandeiras.

Reclamou da Xunta que siga o exemplo doutras comunidades autónomas como Asturias, Castela León, Euskadi ou Cantabria, onde as axudas directas ás explotacións son moito máis cuantiosas. Así, piden que o goberno galego destine 50 millóns de euros en axudas directas, concedendo subvencións por 7,500 euros por explotación (o máximo permitido pola Unión Europea) xa que a crise gandeira que se está a vivir actualmente non ten precedentes, e lembran que "a Xunta conta con todas as competencias para inxectar cartos ao sector".

Finalmente, os socialistas recordan que "o sector precisa menos palmadas nas costas e máis accións de goberno encamiñadas a resolver a difícil situación conxuntural". De non facelo, din, "o Goberno será responsábel do abandono da actividade dos gandeiros galegos".