Vieiros

Todos os proxectos de minicentrais nos ríos presentados na era Fraga e que non foran aprobados antes de 2005, e aqueles que viñeron despois, foron rexeitados polo bipartito. Na anterior lexislatura ficaron paralizados unha vintena de encoros nos ríos do país, porén, agora algúns deles poderían ser construídos nos vindeiros catro anos.

Fontes da Consellaría de Medio Ambiente confirmáronlle a Vieiros que o conselleiro Agustín Hernández, e máis o seu gabinete están a examinar a avaliar o Plan Sectorial Hidroeléctrico de Galiza que deixou o anterior Goberno, e que aínda non foi aprobado. A intención de Medio Ambiente é concretar se lle van dar continuidade a algún dos proxectos de minicentrais que foron presentados a pasada lexislatura.

Nesta liña, dende o Goberno sinalaron que teñen "moi claro" que os ríos galegos teñen un "nivel de aproveitamento hidráulico notabelmente alto", que existen poucos tramos que aínda se poidan empregar. Porén, tamén afirmaron ao tempo que, no caso de que se dese finalmente algunha nova concesión nesta lexislatura, "nalgún tramo concreto e puntual", esta estudaríase "milimetricamente". "Non estamos dicindo que isto vaia pasar, mais no caso de concederse unha nova explotación, sería baixo criterios moi restritivos", sinalaron as mesmas fontes.