Vieiros

"Só exiximos que se manteña a actual lexislación, aínda que sexa cativa". Esta é a petición que fai a CIG-Ensino e as Equipas de Normalización Lingüística dos centros públicos. Con esta demanda presentaron ante o Rexistro xeral da Xunta de Galiza as sinaturas de 356 coordinadores destes grupos, reclamando o mantemento do Decreto de normalización e uso do galego, así como medidas de protección e promoción activa do noso idioma.

O secretario da CIG-Ensino, Anxo Louzao, lembrou que "o galego é a lingua desfavorecida" e recordou que os últimos estudos revelan que o uso da lingua propia de Galiza se atopa en continua recesión. Ademais, subliñou que tanto a central sindical como os profesores non están dispostos "a aceptar medidas que supoñan unha involución".

Finalmente, Louzao asegurou que as sinaturas presentadas este xoves supoñen "un aval ao mantemento da actual lexislación (Decreto 124/2007), que emana do estabelecido no Plan Xeral de Normalización Lingüística, aprobado por unanimidade no Parlamento.