Vieiros

En xaneiro, o Fondo Monetario Internacional (FMI) aínda cavilaba oficialmente en que o conxunto da economía mundial podería rematar 2009 medrando apenas un 0,5%. Desta volta, e andado o primeiro trimestre do ano, o organismo xa agoira que non só non haberá crecemento senón que a caída podería chegar a ser até dun 1%.

Así e todo, na comunicación pública realizada pola institución este xoves, mantense o prognóstico de recuperación para 2010. Iso si, onde o FMI afirmaba que a evolución positiva podería chegar ese ano ao 3%, dan por bo agora que o crecemento se mova entre o 1,5 e o 2,5%. As claves estarían, segundo esa avaliación, no éxito ou non dos estímulos fiscais e da estabilización do escenario financeiro e do mercado da vivenda.