Vieiros

A ONG Amarante, a Asociación Caleidoskopio, o Grupo de Axitación Social (GAS) e Verdegaia, recolleron en Vigo unha convocatoria, que no resto do estado desenvolven colectivos como Attac, Baladre, CGT, Ecoloxistas en Acción e a campaña Quen debe a quen?. Trátase de desenvolver unha campaña de "accións directas, non violentas" coa que se sinalen e denuncien as persoas, institucións, empresas e organismos que están directamente implicados na xeración da crise financeira, económica, ambiental e social na que nos atopamos.

A acción, que será descentralizada e no que poderán participar todos os colectivos e persoas individuais que o desexen, consiste en marcar cun punto negro estes espazos e sedes de institucións, empresas, organizacións. Os lugares marcados fotografaranse, e as imaxes presentaranse na web www.lospuntosnegros.org. A campaña comezou esta quinta feira en varias cidades do Estado Español, entre eles Vigo, onde se sinalaron con puntos negros as sedes das entidades financeiras BBVA, Santander, Caixa Galicia e Caixa Nova, e o Club Financeiro.

Mais alén de sinalar os culpábeis, as organizacións que lanzan a campaña queren amosar as alternativas que se propoñen para saír desta situación dende os movementos sociais. Parella á web dos puntos negros, existirá outra con puntos verdes nos que se sinalarán algunhas accións positivas.