Vieiros

"Sacrificio, traballo, constancia e estudo". Foi parte da receita que lles deixou Manuel Fraga aos cativos do Colegio San Viator, en Huesca. O senador galego visitaba o centro convidado a participar no obradoiro titulado "Escola e Democracia", con alumnos de 4º do ESO e 1º e 2º de Bacharelato. Fraga opinou tamén durante o acto que os colexios han de ocuparse "tamén do ensino e formación en valores e nas ideas básicas do basamento político e orde social".

Finalizado o acto escolar e nun breve encontro cos medios que se producía apenas un día máis tarde de que a Francisco Franco lle retirasen o título de "fillo adoptivo" na súa cidade natal, Ferrol, o ex ministro na etapa franquista deixou unhas polémicas palabras ao respecto. "Non hai que mirar atrás, hai que mirar adiante", comentou Manuel Fraga preguntado sobre as exhumacións de foxas e a retirada de simboloxía relacionada coa ditadura, cualificando as iniciativas derivadas da lei de memoria histórica como "unha serie de erros". "O Che era un criminal, convén recordalo", opinou Fraga ao fío da pregunta doutro xornalista, engadindo a continuación: "Franco nunca foi un criminal, que eu saiba".

Poden ampliar a información no Diario Alto Aragón: "Franco era severo, pero nunca foi un criminal, que eu saiba".

Na web da escola poden ver unha galería de fotos da visita de Fraga.