Vieiros

Anxo Rodríguez, voceiro da Comisión pola Memoria Histórica de Ponteareas, sinalou que entre 1936 e 1950 puido haber sete mil mortos en Galiza por mor da represión franquista. Segundo estes mesmos datos, arredor de cinco mil terían sido asasinados durante a Guerra Civil. Rodríguez basea esta cifras na documentación conxunta da Plataforma de Vítimas de Desaparicións Forzadas, da que forma parte o colectivo ponteareán.

Rodríguez sinalou nunha conferencia de prensa que vai entregar os datos da comarca do Condado, pero tamén da cidade da Coruña, neste caso grazas á colaboración da Comisión pola Memoria Histórica desta cidade, ao xuiz Baltasar Garzón. Entre o material tamén se atopan documentos audiovisuais das exhumacións que se fixeron en Ponteareas.

O colectivo de Ponteareas sinala que tamén asumirá a investigación impulsada pola Consellaría de Cultura, que cifra en 3.558 as vítimas mortais entre 1936 e 1939. Porén, Rodríguez considerou que as 26 foxas comúns que estima a Xunta pode ser unha cifra baixa e que o número total pode ser moito maior.

Pola súa parte, o voceiro de Amnistía Internacional en Galicia, Alberto Estévez, criticou que nove meses despois da aprobación da Lei da Memoria Histórica, “aínda non se elaborasen os regulamentos para a creación dun mapa de foxas e para a posta en marcha dun protocolo para a exhumación dos corpos”,