Vieiros

O PSdeG-PSOE tamén escenificou esta fin de semana o comezo do curso político. O seu vicesecretario xeral, Ricardo Varela, marcou como reto lograr "uns presupostos bos" para que Galiza afronte o que queda de lexislatura e pide "lealdade" ao BNG para as decisións do Executivo galego.

Con motivo da súa participación na festa-mitin dos socialistas galegos celebrada en Muxía, Varela defendeu que Galiza debe dispor dunhas contas que "axuden na loita contra as dificultades económicas".

Tamén avogou por conseguir que os Presupostos Xerais do Estado recollan o 8% dos investimentos para Galiza e recalcou que a AVE "continúa a ser un obxectivo absolutamente prioritario". En referencia ao BNG, Ricardo Varela dixo que "espera lealdade nas decisións de goberno, espera responsabilidade". "Non se pode estar na misa e repicando, como fixeron, por exemplo co Plan Acuícola, un proxecto de todo o goberno," advertiu.

Sobre o PPdeG

En relación ao PPdeG, o vicesecretario dos socialistas galegos opinou que o presidente deste partido, Alberto Núñez Feijóo, "ten dificultades para explicar un adianto electoral que nunca existiu, que nunca se anunciou, que nunca se confirmou". Varela amosouse convencido de que os populares perderán as eleccións "en marzo" como "as perderían en outono".