Vieiros

Transcorreron seis anos desde a elección de China por parte do Comité Olímpico Internacional (COI), e as ONG coinciden en que esta decisión levou as autoridades chinesas a intensificar a represión para ofrecerlle ao mundo unha imaxe de estabilidade.

A poucas horas da cerimonia de inauguración, as campañas continúan para que os Xogos Olímpicos contribúan a que se cumpran os dereitos humanos:

Tibet
Avaaz.org aproveitou os XXOO para recoller sinaturas coa fin de que China respecte o pobo tibetano e abra un diálogo co Dalai Lama. Ti tamén podes participar asinando ou uníndote á iniciativa da Casa do Tibet de Barcelona que convida a participar nas protestas pacíficas en todas as cidades do mundo á hora na que se inauguran os Xogos.

Represións aos activistas de dereitos humanos
Amnistía Internacional leva recollidas 22.260 sinaturas para enviar unha carta ao primeiro ministro da República Popular de China coa fin de que terminen as detencións ilegais, a pena de morte, a censura e a represión aos activistas. Contribúe coa túa sinatura á mellora dos dereitos humanos durante e despois da cita olímpica.

Liberdade de información
Reporteiros Sen Fronteiras (RSF) leva a cabo unha campaña con demandas para loitar pola liberdade de información, e recorda que China encarcerou a 30 xornalistas e 50 internautas por expresar a súa opinión. Podes unirte á cibermanifestación de RSF o próximo 8 de agosto a través de www.rsfbeijing2008.org. Tamén podes asinar para pedir a excarceración de xornalistas e internautas.

Dereitos laborais
Xoga Limpo 2008 denuncia a explotación infantil e laboral á que someten aos traballadores as marcas deportivas. A campaña recorda que o COI concede licenzas para a elaboración do material dos Xogos a empresas que contratan menores e violan os dereitos laborais. Colabora coa iniciativa enviándolle un correo aos principais líderes da industria téxtil.

Máis información
Nesta web atoparás varios informes sobre dereitos humanos que elaborou Amnistía Internacional con motivo dos Xogos Olímpicos Beixín 2008

Campaña Roupa Limpa

Podes ler outras noticias relacionadas cos Xogos Olímpicos publicadas por Canal Solidario.org.