Vieiros

O conselleiro de Innovación e Industria defende a repotenciación dos actuais aeroxeneradores, e mesmo a súa redución, no canto de crear máis parques eólicos. Porén, Fernando Blanco non descarta a creación de máis parques, sempre que cumpran os requisitos previstos na lexislación. Neste sentido, apela ao decreto eólico, onde se recollen os criterios e condicións necesarias para a produción de enerxía.

Pola súa banda, o conselleiro de Medio Ambiente insiste en que debe primar a mellora das instalacións existentes fronte á creación doutras novas. Manuel Vázquez é partidario de ocupar o menor chan posible, se ben entende que o reparto eólico está condicionado polo futuro Plan Sectorial Eólico de Galiza.

A vindeira semana
Nuns días coñeceremos cales son as empresas que optarán ao concurso eólico para a repartición de 2.300 megavatios. Despois de que pechase o prazo o pasado 18 de xuño, Fernando Blanco adiantou que a vindeira semana se fará unha primeira avaliación daquelas empresas que poden ser admitidas, por cumpriren os requisitos.

Un total de 75 grupos empresarias presentáronse a este reparto eólico, cunhas demandas que duplican os megavatios que a Xunta de Galiza ten previsto adxudicar. De entre as solicitudes que transcenderon, destacan o proxecto liderado por catro cooperativas leiteiras ou a proposta feita polos empresarios Manuel Jove, Xacinto Rei e Epifanio Campo xunto co grupo Ence.