Vieiros

Despois de que o pasado mes de febreiro o Xulgado do Penal número 3 de Pontevedra condenase ao alcalde de Dozón, Adolfo Campos, a nove anos de inhabilitación ao entender que cometera un delito de prevaricación, agora coñecemos a resposta ao seu recurso. A Audiencia provincial de Pontevedra vén de estimar a súa apelación e declara a nulidade parcial da sentenza. Ademais, ordena o reenvío da causa novamente ao Xulgado do Penal para que dite unha nova resolución.

Dende o concello de Dozón, un comunicado informa de que esta anulación se debe á necesidade de que se razoen pormenorizadamente os feitos que puideran constituír a prevaricación, xa que non constan na sentenza as resolucións da alcaldía que puideran infrinxir a lei.

Mentres, a defensa asegura que este fallo da Audiencia nun supón nin que vaia a haber outro xuízo nin que o alcalde vaia quedar absolto. Di que máis ben é unha cuestión técnica e que o cambio que deberá facer agora o xulgado é ampliar a información sobre as causas que conlevaron a condena anterior.