Vieiros

O Torneo masculino das Nacións comeza esta sexta feira á tarde. O primeiro partido ha enfrontar a Galiza e a Portugal, ás 18:00 horas. Dúas horas despois xogan Cataluña e Euskadi.

O sábado, que é tamén o Día das Seleccións Deportivas Catalás, comezará a loita polo terceiro e cuarto posto será ás 18:00, e a final, que será ás 20:00 horas.

Galiza e Portugal na primeira semifinal
A Galiza de Diego Ocampo hase enfrontar a Portugal, equipo dirixido polo galego Moncho López, quen ademais, con este encontro, debuta sobre a cancha como seleccionador nacional.

A nosa selección contará coa presenza de Lucho Fernández, que vén de gañar a ACB co TAU, e que ten que se incorporar á expedición galega tras a baixa de Manu Cagiao, por enfermidade.

Galegos e portugueses xa levan un día en Xirona preparando o primeiro encontro, buscando un posto na final do sábado. Os portugueses, que xa se amosaron máis dunha vez encantados co seu novo seleccionador, demostrarán sobre a cancha o aprendido nos poucos adestramentos xuntos que puideron facer ás ordes de López. Os galegos saben que o nivel é alto (sobre todo pola parte catalá, onde hai xogadores coma Ricky Rubio, o potente base do Joventut), pero chegan confiados e con ganas de demostrar o que saben facer.