Vieiros

Baixo o título Venres temáticos, a formación xuvenil do PPdeG, Novas Xeracións, organiza un ciclo de coloquios e proxeccións, que percorrerá distintas vilas do país "tentando achegar á mocidade galega aspectos que sexan do seu interese".

O ciclo, que comeza este venres ás 19:00h na sede local do Partido Popular de Pontevedra e que será presentado pola presidenta da organización, María Seoane, utilizará distintos documentais "de recoñecidos autores internacionais" para abordar aspectos actuais como o cambio climático, a sociedade da comunicación ou os novos campos de investigación.

Nesta primeira sesión, o tema a analizar será a globalización, así como os movementos contrarios ao xeito en que este fenómeno se está a desenvolver. Proxectarase o filme En Defensa da Globalización, que dará pé a un posterior coloquio onde os asistentes poderán debater sobre as súas vantaxes ou os seus inconvenientes.

Taiwán, Vietnam e Quenia
O documental, realizado polo economista sueco Johan Norberg en 2003 e inspirado no seu propio libro En Defensa do Capitalismo Global, defende os valores da democracia occidental e do liberalismo económico.

Para argumentar a súa teoría, Norberg viaxe a tres países: Taiwán, "que adoptou unha economía de mercado hai uns corenta anos", Vietnam, "que comeza a facelo actualmente" e Quenia "onde só se conseguen trazas de capitalismo". "As diferencias entre eles son, dende logo, abismais...", sinalan dende Novas Xeracións.