Vieiros

O Movemento polos Dereitos Civís comunicou este xoves a súa tranquilidade sobre a denuncia realizada no seu momento ao respecto das recomendacións que presuntamente se lle terían trasladado aos axentes da Garda Civil nalgúns cursos de formación interna. O colectivo asegura que achegará a documentación correspondente se un xuíz llela require.

De paso, critican a posición adoptada pola Dirección Xeneral da Policía e a Garda Civil, que estudan coa fiscalía "a posíbel existencia dun delito contra as institucións do Estado". Segundo as interpretacións da dirección xeral, a revelación destes datos son "feitos inxuriosos e falsidades tendentes a lesionar a dignidade dun corpo das Forzas de Seguridade do Estado". Pola contra, tal e como lembran desde o MpDC, desde a Unión de Gardas Civís, admitirían a posíbel existencia desas consignas aos axentes, pero atribúenlla no seu caso a "mandos que nunca estarían destinados en Galiza e que por iso descoñecen a realidade galega".