Vieiros

Se desde comezos de ano o butano, amplamente usado en moitos fogares, custaba 12,94 euros por cada bombona de 12kg, a partir da semana que vén os consumidores deberán pagar até 14,10 euros. O Ministerio de Industria confirmaba este venres a autorización dun incremento do 8,96%, atribuíndollo ao "encarecemento" do custo da materia prima e xustificando ademais que países como Francia ou Portugal teñen fixados prezos para a bombona que case dobran os que se pagan a nivel estatal.

Desde diversos colectivos critican duramente unha decisión que por exemplo desde FACUA-Consumidores en Acción cualifican de "brutal", recordando que dobra o propio Indice de Prezos ao Consumo do último ano. O colectivo denuncia que se permita unha subida que "dana" gravemente os petos dos consumidores para "manter as marxes do sector". Segundo Consumidores en Acción, a modificación do prezo da bombona que se fai trimestralmente debe atender tamén a criterios políticos "que ponderen tamén os intereses dos usuarios". No mesmo sentido o analizan desde a Confederación Estatal de Consumidores, CECU, advertindo de que é un incremento "excesivo" que ignora a situación pola que pasan na actualidade as economías domésticas.