Vieiros

O presidente do parlamento europeo, Hans Gert Pöttering, ameazou este sábado a China co boicot aos Xogos Olímpicos de Beixín en resposta á represión das protestas da poboación tibetana. Ademais, exixiulle ao goberno chinés que negociase co Dalai Lama, líder espiritual do Tíbet.

"Non podemos descartar un boicot ás Olimpíadas. Queremos que os Xogos se organicen con éxito, mais non se o prezo para iso é o xenocidio cultural dos tibetanos do que fala o Dalai Lama", dixo Pöttering, membro da Unión Cristianodemócrata (CDU) que preside a chanceleresa alemá Angela Merkel.

En declaracións ao Bild am Sonntag -que sairán publicadas este domingo- o presidente da Eurocámara anunciou que esta cuarta feira o parlamento abordará a situación no Tíbet e que aconsellará "os países da UE" que se pronuncien cunha soa voz pola defensa dos dereitos humanos".

As declaracións de Pöttering prodúcense logo de que Alemaña normalizase as súas relacións con China tras as tensións xurdidas con motivo da reunión que mantiveron o ano pasado Merkel e o Dalai Lama.