Vieiros

Touriñán: Esta Piscifactoría, foi a primeira excluída por esta Administración, despois das queixas dos grupos ecoloxistas. Pescanova, comezou as obras antes de ser aprobadas (no medio do caos das labores de limpeza do Prestige), e antes de ser aprobado o borrador do Plan de parques de tecnoloxía alimentaria aprobada pola Xunta do PP. As obras foron paradas tras a denuncia da FEG ante a garda Civil. A nova Administración tomouno coma símbolo da nova política da nova política neste sector.
Punta do Corno: Esta piscifactoría, ao igual que a de Touriñán, foi tamén desbotada pola revisión presentada pola Xunta actual, polo que non é nada novo.
Punta Corvos: Planta situada en Ribadeo, xa non estaba contemplada polo Plan acuícola presentada no verán do ano pasado.
Couso-Aguiño. Planta proxectada en terreos barallados para rede natura 2000, e excluída no 2004 pola Administración de Fraga. Este parque, vertería as súas augas en augas protexidas do parque nacional, e proposta para Reserva Mariña para o Convenio OSPAR.
Ardía: Planta xa existente, pertencente a Pescanova e cando se presentou o Plan no Consello Galego de Medio Ambiente, ao estar dentro de Rede Natura 2000, a superficie proxectada no Plan non supoñía a ocupación de toda a superficie. Esta afirmación nunca se chegou a explicar
As outras que se sinalan como "suprimidas" non son supresión, senón que non se amplían as piscifactorías xa existentes.
Dos parques reducidos, A Federación non dispón de datos para valorar a importancia da súa reducción. Porén, cabe destacar o seguinte:
Regodola, Meirás, Cabo Cee: O Plan actual tiña previsto a súa reducción con respecto ao Plan de 2005. No caso de Meirás, ao igual que no caso de Ardía, a Consellería asegurara que a superficie de obra e a plasmada no Plan non ían ser a mesma. Este termo nunca se concretou. Aínda así, non explicou se a reducción é respecto ao proposto no 2005, ou é en base aos 22000m2 do Plan que está enriba da mesa.
Ao resto, curiosamente, parece que foi atendendo a reclamación das mesmas empresas, que solicitaron unha redución da superficie por motivos varios.
Nada de nada ás reclamacións da sociedade. Coma xa anunciara o anterior Director de Recursos mariños, antes de rematar o prazo de alegacións, "O plan acuícola non se ía mover", pois parece que así é, de pouco serven as máis de 1000 alegacións presentadas.
Entendemos que a manifestacións feitas no día de onte no Parlamento, polo responsable de pesca, non é máis que unha intervención de estética frente á oposición da sociedade ante este Plan, e que se dou a luz na Manifestación de "Galicia Non se Vende", e que, analizando as desmedidas declaracións dos políticos galegos, non gustou nada.
A FEG quere sinalar que as instalacións que considera cun impacto ambiental máis negativo seguen proxectadas, e que en ningún momento houbo intención de negociar dito Plan. O dereito á participación da Sociedade no deseño das políticas sectoriais, considerado mesmo pola UE como garante dunha planificación e desenvolvemento transparentes, non existe.
Aliás, a FEG considera que non ten sentido nestes momentos, este Plan acuícola, cando se está a facer un Plan de Ordención do Litoral de Galicia e cando se está traballando para ampliar a Rede Natura 2000. Isto demostra que en Galicia segue a gobernar o caos, e que no goberno de Galicia cada Conselleiro vai polo seu lado.

Taboas do borrador do plano Acuícola de Galiza