Vieiros

En Darfur a violencia obrigou a fuxir das súas casas a máis de 2,5 millóns de persoas; todos eles convertéronse en refuxiados e ti debes protexelos e garantir que estean seguros nos campos de refuxiados.

Esta é a misión que Darfur está morrendo encomenda aos seus xogadores que, a través deste videoxogo, coñecen que pasa nesta rexión de Sudán, séntense na pel dun refuxiado e ven os problemas que existen para facer chegar a axuda humanitaria e o que fai e non fai a comunidade internacional. Detrás deste vídeo de simulación hai un grupo de persoas da Universidade do Sur de California, que para crear a ferramenta contou co apoio de traballadores humanitarios e a entidade International Crise Group.

Xogar a videoxogos é unha práctica habitual no tempo de lecer de nenos e non tan nenos. No Estado Español, só en 2006, o consumo deste tipo de xogos chegou aos 967 millóns de euros, segundo datos recollidos por entidades especialistas como a Asociación Española de Distribuidores e Editores de Software de Entretemento (Adese) e o portal Consumer. Por iso é polo que, cada vez máis, as ONG apostan polos videoxogos como ferramenta de sensibilización.

Se en Darfur está morrendo, International Crise Group dá a coñecer a realidade dos refuxiados sudaneses en xeral, en Refugee Intermón Oxfam pon nome e historia persoal ao teu personaxe: chámaste Aissa, tes catro fillos e con eles debes cruzar o deserto esquivando minas antipersoais en busca dun lugar que garanta o voso alimento. Como explica Intermón cando te matan, "isto non é só un xogo. Millóns de persoas sofren esta situación cada día en África". Podes xogar na súa web ou baixarte o xogo ao teu teléfono móbil.

Outras organizacións como Mans Unidas levan o típico xogo de mesa de preguntas e respostas á Rede e aproveitan para sensibilizar. Sabes cantas persoas sobreviven con menos dun euro ao día? Que tanto por cento do gasto militar faría falta investir para facer posible o acceso a auga potábel a todo o mundo? Se sabes a resposta, volve tirar o dado!

Save the Children, en cambio, aproveita os xogos online para dar a coñecer outras culturas e sensibilizar sobre os dereitos da infancia no planeta, mentres que dende a web de Greenpeace internacional anímante a xogar e situarte contra as armas e a enerxía nuclear. E o mesmo fai Nacións Unidas con xogos como Food Force, Habbo Hotel e portais específicos como Enrédate e Ozonalia.

Como usar os videoxogos
Especialistas como Elisabet Bartrina, da Fundación Pere Tarrés, explican que os videoxogos teñen funcións educativas que pasan dende transmitir valores, até adquirir habilidades co mundo dixital, desenvolver a autoestima, aprender a compartir e favorecer a coordinación. O importante, engade, é "facer un uso responsable" e contar coa supervisión, no caso dos menores, de pais e educadores.

A responsabilidade da familia e os educadores para que os menores non accedan a videoxogos de carácter violento debería tamén ir compartida con outros actores como as empresas responsables destes xogos e a administración. Segundo Amnistía Internacional (AI), unha das maiores dificultades nestes momentos é que os menores poden comprar "sen ningunha dificultade" a videoxogos para adultos, "tanto en grandes superficies como en establecementos especializados".

Na actualidade, está en marcha o sistema de clasificación PEGI, que se basea na autovaloración das empresas de software de entretemento. Pero en opinión de AI, este mecanismo non é suficiente nin se está cumprindo, polo que o goberno español debería establecer un marco legal para que os menores non accedan a videoxogos clasificados para adultos "ou que directamente banalizan as violacións de dereitos humanos".

Game over? Sal do xogo e actúa!
Neste contexto, varias organizacións apostan polos videoxogos como unha ferramenta máis que, cun uso correcto, pode levar á xente a interesarse máis pola realidade noutros países e por temas de desenvolvemento e inclusión social.

E o máis importante: os videoxogos serven para sensibilizar pero cando acaba a partida tamén poden levar aos xogadores e xogadoras a interesarse máis por unha realidade, polo labor dunha entidade e a informarse sobre que poden facer eles para cambiar as cousas.

"Actúa agora. Termina a matanza", interpela o xogo Darfur está morrendo, e desde a súa web dinche como organizarte e facer oír a túa voz para dicir basta ao conflito en Sudán. Intermón Oxfam vai máis aló do seu xogo Refugee e dá máis detalles da realidade no país e de como actuar, Greenpeace anima a participar nas súas ciberaccións e outras entidades aproveitan o videoxogo online para derivar logo á súa páxina web e ampliar a información.