Vieiros

A proposta está explicada no estudo presentado este luns en Vigo polo Eixo Atlántico. O documento destaca especialmente que as conexións de alta velocidade do Eixo Atlántico redundarán nun beneficio para a zona do litoral galego e portugués, onde se concentra o 80% da poboación de Galiza e o norte portugués así como os principais núcleos industriais. De xeito paralelo, advirte de que o interior continúa o seu "paulatino despoboamento", circunstancia que dificulta a xustificación de investimentos en infraestruturas, unha carencia que, á súa vez, fomenta o abandono destas áreas xeográficas, entrando así en "nun perigoso círculo vicioso do que é difícil saír".

Fronte a esa situación, o informe sostén que a mellor forma de afrontar as carencias no ámbito das comunicacións sería a creación dun consorcio transfronteirizo de transportes entre Galiza e o norte de Portugal. Trátase dun servizo que conectaría as zonas de interior, que sofren un maior illamento, coa costa, máis favorecidas por investimentos en infraestruturas. O consorcio constituiríase en órgano de representatividade das administracións de ambos os dous países e "funcionaría como unha autoridade responsábel da funcionalidade e deseño da oferta de transporte público" aínda que "claramente diferenciada das empresas operadoras".