Vieiros

O Consello de Goberno aprobou esta quinta feira as Normas do Hábitat Galego (NHG) que marcan as calidades mínimas coas que se deben construír as novas vivendas, e que salientan principalmente polo estabelecemento dun incremento da superficie mínima das vivendas de 26 a 40 metros cadrados.

As NGH, presentadas o pasado 24 de abril no Parlamento pola conselleira de Vivenda, Teresa Táboas, dentro do Plan de Calidade na Edificación do departamento, fixan aspectos como a accesibilidade, a iluminación, a ventilación e a funcionalidade das vivendas, así como os remates dos edificios ou os espazos públicos.

Estas normas substitúen o actual Decreto de Habitabilidade de 1992 e son de total aplicación para as vivendas de nova construción. que van ser máis flexíbeis cos requisitos nos solos con ordenación detallada. Ademais, non se aplicará nas obras que xa solicitasen a licenza de obra antes da súa entrada en vigor.

A verificación do cumprimento da norma vai ser responsabilidade compartida entre Xunta e municipios aínda que en última instancia será destes, a través da licenza de primeira ocupación.

210 euros para o aluguer
Por outra banda, a Consellaría e o Ministerio español de Vivenda asinaron un convenio de colaboración, na tarde deste xoves en Madrid, para aplicar a Renda Básica de Emancipación en Galiza, que entrará en vigor en xaneiro de 2008. Esta concede unha axuda de 210 euros a mozos de entre 22 e 30 anos para subvencionar o aluguer dunha vivenda.

As axudas deberán ser solicitadas e xestionadas nas oficinas que a consellería ten en funcionamento en cada unha das sete grandes cidades do país, onde xa se está a levar a cabo toda a tramitación relativa á concesión de axudas do Programa de Vivenda en Aluguer da Xunta.