Vieiros

Representantes dos sindicatos CCOO, UXT e CIG mostraron a súa satisfacción ante o "éxito total e absoluto" de seguimento na primeira xornada da folga da construción de Pontevedra, este martes.

Pola súa banda, a Asociación Provincial de Empresas da Construción de Pontevedra (APECPO) cifrou o apoio ao paro nun 77%, proporción que estimou tras recoller datos dun total de 131 centros de traballo.

A patronal denunciou ademais tres sucesos de "gravidade". Segundo a APECPO, no Porriño esnaquizouse o cadro eléctrico dunha obra, e en Pontevedra destruíuse a maquinaria eléctrica dunha grúa torre e arrebatóuselle de xeito violento o teléfono móbil a un traballador que non quería secundar a folga.

Conflito "longo e duro"
Os piquetes de traballadores comezaron a súa actividade sobre as 7.30 horas e percorreron diversos puntos, como as bisbarras do Salnés, Pontevedra e Vigo. Posteriormente, traballadores da zona sur de Pontevedra acudiron a Vigo ao mediodía e concentráronse na Porta do Sol, onde permaneceron unha hora cortando o tráfico e apupando a sede da patronal.

A partir das 13.00 horas, representantes de cada unha das tres centrais sindicais (Xosé Xoán Melón, CIG; Xosé Antonio Álvarez, UXT; e Francisco Estévez, CCOO) dirixíronse a uns 500 traballadores alí reunidos, onde falaron de "obxectivo cumprido" e prognosticaron un "longo e duro" conflito.

Segunda xornada
Este mércores está prevista a segunda xornada. Entre as 12.00 e as 12.30 horas volveranse concentrar na Porta do Sol de Vigo, e, tras isto, non se descarta continuar cunha manifestación polas rúas da cidade.

Unhas 45.000 persoas traballan no sector da construción nas comarcas de Pontevedra. Ademais da deste martes e mércores, haberá novas xornadas de folga os días 8 e 9 de outubro. De non se chegar a un acordo coa patronal, farase indefinida e continuada a partir do 16.

Entre as principais reivindicacións do sector están as melloras salariais e o aumento da estabilidade laboral, a posibilidade de que o traballador poida elixir xubilarse de forma anticipada ou a xornada continuada de verán, entre outros aspectos.