Vieiros

Na mesa-debate participan a Vicedecana da Facultade de Ciencias Sociais e da Comunicación da Universidade de Vigo, Mónica Valderrama; a socióloga e profesora da Universidade da Coruña, Carmen Lamela; a xornalista e escritora asturiana Isabel Menéndez, e a recentemente licenciada en xornalismo Susana Pombo. Distintas ópticas analizarán o papel da muller nos medios, tanto no que atinxe á súa proxección social como internamente, no relativo ó eido laboral. Distintas ópticas e visións xeracionais, toda vez que Susana Pombo é unha moza de 23 anos que ben pode representar á xuventude e falarnos da visión que esta ten no relativo á muller na comunicación e no conxunto da sociedade.

Dentro do mundo da Comunicación, o C.I.P. considera fundamental abordar tamén o papel das mulleres no eido da Publicidade, tanto como 'obxecto publicitario' -aínda que os pasos adiantados son moitos neste aspecto- como no tocante ó labor das mulleres como creativas no sector publicitario. É diferente a visión dun creativo e a dunha creativa? Aborda profesionalmente os temas publicitarios de xeito diferente un home ca unha muller? En que tipo de anuncios se utiliza máis á muller como obxecto de atracción e sedución para o mercado? Eva Conesa, directiva do Club de Creativos, abordará este tema.