Vieiros

Os grupos que conforman a oposición na corporación municipal, BNG, PSdeG e EU-IU, participaron na concentración na que se lle esixe ao concello que paralice a construción do edificio que a empresa Abeconsa constrúe na Praza de España. Trátase dun inmoble que chegará até os 21 metros de altura, con cinco plantas e dous sotos, e que será destinado á explotación privada en concesión durante sesenta anos.

Arredor de 300 persoas, segundo a policía, participaron nesta concentración, a terceira que se convoca na cidade coruñesa por mor do polémico edificio. A anterior, levada a cabo o pasado 21 de xaneiro, convocou a unhas dúas mil persoas. A cita deste domingo xa estaba convocada antes de que Política Territorial ordenase esta semana paralizar as obras por infracción grave ao Plan Xeral de Ordenación Municipal.