Vieiros

Agosto de 2007

AGIR quer fazer públicas umhas consideraçons acerca da Plataforma por trás do Manifesto por um Ensino em Galego, sobre o qual nos posicionamos e ao qual aderimos:

1. Foi apresentado à opiniom pública como um acordo entre "as quatorze organizaçons mais representativas da comunidade educativa".
Porém, entre elas estám presentes os CAE e o Sindicato de Estudiantes, entidades de muita menor presença que a nossa.

2. Dixo saír à luz com o fim de promover e alargar o sustento social dentro da escola ao novo decreto de normalizaçom aprovado polo governo galego.
Porém, mais umha vez ignorárom sem qualquer vergonha a organizaçom estudantil da esquerda independentista quem, novamente, padece em primeira pessoa o sectarismo partidista dos satélites da UPG, a fobia independentista e a discriminaçom pola opçom normativa da AGAL que nós representamos.

3. Formou-se sem lugar a dúvidas como estratégia de contra-reacçom perante os malabarismos fascistas de entidades vencelhadas à ultradireita espanhola na Galiza e ao Partido Popular. Assim sendo que a defesa do idioma nacional exerce de agente aglutinador.
Porém, apoia-se em CC.OO.-Ensino, FETE-UXT ou o Sindicato de Estudiantes, toda umha "vacina galeguizadora" para o Manifesto, mas esquece intencionadamente o trabalho permanente e monolingüe em galego da esquerda independentista representada em AGIR após 7 anos de existência.

Perante estes argumentos expostos, @s jovens estudantes de AGIR queremos manifestar o nosso mais absoluto rechaço às práticas que pretendem isolar o independentismo galego na escola, vertendo o nosso trabalho na lixeira do esquecimento.

Merecem um monumento à hipocrisia quem, com a sua conduta, amosam na realidade temer-nos e isolar-nos mais a nós que ao fascismo espanhol.

AGIR nom acredita que a luita por umha escola em galego deva cingir-se à política institucional. Aliás, nom acreditamos em nengum dos partidos presentes na administraçom pública em todos os seus níveis. O seu trabalho, tanto do PP, do PSOE-BNG ou de IU, tem-se demonstrado, quer contrário à nossa língua, quer incapaz e indolente ante a espanholizaçom das aulas.

Porém, nom renunciamos a pôr-nos à frente do dique de contençom da maré fascista que semelha presta a reagir com obscenidade contra qualquer iniciativa, por tímida e insuficiente que esta for, em defesa do galego. Mesmo quando advertimos os défices que vimos de expôr, o nosso afám de convergência para dinamizar a galeguizaçom da Escola deve reger-se polo espírito de consenso que nós, ao contrário que outrem, procuramos com honestidade.

Acreditamos, enfim, que nesta batalha eterna pola preservaçom da identidade estamos todos e todas @s que temos um verdadeiro compromisso com a língua galega. Nós, @s primeir@s.

É por isto que solicitamos das organizaçons comprometidas com o cumprimento do novo decreto a admissom de AGIR dentro desta Plataforma de recente criaçom, como mais umha oragnizaçom subscritora do Manifesto em igualdade de condiçons com as restantes.

Como já figemos outras tantas vezes, solicitamos das organizaçons assinantes do manifesto a consideraçom da necessidade de fazer pressom contando, também, com a organizaçom estudantil da esquerda independentista. Porque um gesto no sentido contrário só serve para desacreditar plataformas que se dizem nascidas com espírito de somar, e nom restar, polo GALEGO.


TEXTO ÍNTEGRO DO MANIFESTO na normativa ILG-RAG empregada polos colectivos redactores:

ENSINO EN GALEGO

O sistema educativo non garantiu, até o de agora, nin tan sequera que o alumnado puidese finalizar o ensino obrigatorio cunha competencia comunicativa en galego igual á conseguida en castelán, a pesar de que ese é legalmente un dos obxectivos da escolarización. Aínda é máis grave o feito, sinalado unanimente por todos os estudos oficiais, de que a escola incide no abandono do galego por parte de moitos nenos e nenas. A pesar dos esforzos de moitos pais e nais, profesoras e profesores, estudantes, persoal administrativo e da sociedade en xeral, non se conseguiu introducir un proxecto global de aprendizaxe na lingua propia do noso país: o galego. En calquera sociedade do mundo resultaría cando menos paradoxal que a institución escolar cumprise un papel pouco favorábel ao desenvolvemento da súa propia lingua.A Declaración Universal de Dereitos Lingüísticos (1997), a Carta Europea de Linguas Rexionais ou Minoritarias (2001) e o Plan Xeral de Normalización da Lingua Galega (2004), representan tres grandes acordos para avanzar na normalización lingüística que se subscribiron no último decenio por unanimidade nos diversos foros de representación democrática. Acordos que, porén, non conseguiron acadar os obxectivos previstos, ao non se facer efectiva durante todo este tempo a súa aplicación. Lembremos a ese respecto o contundente informe aprobado en 2005 polo Comité de Ministros do Consello de Europa, no que recordaba que o sistema educativo galego non estaba á altura dos compromisos de normalización lingüística adquiridos a nivel internacional polo Estado español.As persoas e entidades que apoiamos este manifesto consideramos que a aplicación do decreto 124/2007, polo que se regula o uso e a promoción do galego no sistema educativo, debe significar un punto de inflexión nesta dinámica. Porque sabemos que, avanzando no proceso de normalización, o ensino gañará en calidade, en proximidade e mesmo en logros académicos, ao afortalar as destrezas lingüísticas do alumnado.Facemos un chamamento ao conxunto da comunidade educativa para que este novo decreto sexa cumprido plenamente no curso 2007/08, e á Administración educativa para que garanta ese cumprimento, pondo para iso todos os medios humanos e económicos que foren precisos. Singularmente, demandámoslle á Administración educativa a dotación do profesorado necesario, plans ambiciosos de formación do profesorado e do persoal administrativo, unha actitude próxima e dilixente da inspección de ensino e campañas de sensibilización dirixidas a desterrar os prexuízos existentes sobre a presenza escolar do galego.O galego é un patrimonio común e un elemento de unión de todas as galegas e de todos os galegos. A todas e todos beneficia e a ninguén prexudica que poidamos vivir e aprender no noso idioma.