Vieiros

Non era o único conflito aberto entre as dúas grandes forzas políticas neerlandesas que sosteñen o goberno, pero si aparece como a pinga que fixo o vaso reverter. A petición da OTAN aos Países Baixos para o incremento das tropas en Afganistán acabou facendo imposíbel o entendemento entre os dous pés da coalición.

A OTAN propuxéralle ao executivo neerlandés que os 2 milleiros de soldados que mantén despregados naquel país permanecesen durante máis tempo. Diante desta situación, os democristiáns amosáronse favorábeis a que, senón todos, si un grupo dese destacamento, estivese en Afganistán máis aló de agosto de 2010, que era a data fixada para a retirada completa. A decisión era rexeitada polos socialdemócratas, recordando a promesa aos cidadáns de que todas as tropas deixarían Afganistán.

Finalmente, na madrugada do venres cara ao sábado, os democristiáns (CDA) do primeiro ministro Jan Peter Balkenende e o Partido Socialdemócrata do viceprimeiro ministro Wouter Bos, acordaron rachar o acordo de goberno, segundo este sábado se fai eco a prensa neerlandesa.