Vieiros

O mantemento da actividade económica e dos actuais postos de traballo vencellados aos estaleiros tradicionais así como a creación doutros novos que xeren novos empregos directos e indirectos é un dos argumentos expostos en prol dun estatuto xurídico propio que protexa as embarcacións históricas e tradicionais.

A lei está xustamente agora no treito de achega de emendas na comisión de Xustiza do Congreso e un conxunto de colectivos defensores do patrimonio aproveitar para pedir o amparo lexislativo para o sector. Insisten en que se trata dun sector emerxente "clave" no ámbito da cultura marítima e o seu potenciamento vai en favor do turismo cultural e o desenvolvemento do turismo mariñeiro. Expoñen que así se ten demostrado en xeografías costeiras de Francia, Países Baixos ou o Reino Unido. Subliñan o desafío da "conservación, protección e difusión do legado cultural marítimo, evitando así a perda irreparábel do saber da xente do mar e dos seus oficios artesanais".

A iniciativa está apoiada entre outros polo Museo do Mar de Galicia, a Federación Galega pola Cultura Marítima e Fluvial, o Museu Marítim de Barcelona e Xarxa de Museus Marítims de Catalunya, o Museo Arqueológico y Etnográfico Municipal de Xàbia (Alicante), e federacións de cultura e patrimonio marítimo de Andalucía e Cataluña, Euskadi, Baleares ou Canarias. Un feixe de colectivos que a nivel estatal leva anos mirando pola conservación e difusión do patrimonio e a cultura marítima.