Vieiros

"Os comicios presidenciais chilenos do pasado 17 de xaneiro, que certificaron o retorno da dereita ao poder logo 52 anos, abren un novo período electoral para América Latina entre 2010 e 2012, con posibilidades reais de variación do mapa político hemisférico".

O Instituto Galego de Análise e Documentación Internacional (Igadi) realiza unha análise desta posíbel situación nunha nova entrega do Igadi Paper, o número 28º: América Latina tralas eleccións chilenas.

O empresario Sebastián Piñera, que "afronta unha nova etapa dentro da consolidada democracia chilena", sucederá a socialdemócrata Michelle Bachelet o próximo 11 de marzo, que se retira cuns niveis de popularidade que alcanzan o 80% de aceptación na sociedade chilena.

"O seu triunfo pode marcar unha nova tendencia electoral en América Latina, en especial en comparación co período 1999-2009, onde predominaron os gobernos de esquerda", consideran no Igadi. A dereita podería asentar e gañar espazos logo das presidenciais que están por vir: Colombia, en maio; Brasil, en outubro; e Perú e Arxentina, en 2011.