Vieiros

"Esta publicación non é máis que unha continuación do ataque á nosa cultura iniciado polos responsábeis da Deputación de Ourense coa creación da Escola de Gaitas e a Real Banda de Gaitas". Explícano así desde a Asociación de Gaiteiros Galegos (AGG), reprochándolle á Escola Provincial de Gaitas da Deputación a edición recente dunha obra en catro idiomas (alemán, francés, inglés e español), esquecendo xa que logo o galego.

Trátase do voulme “La gaita. Imágenes para la historia de un instrumento popular europeo", da autoría de Fritz Schneider. Un estudo que inclúe máis de 150 imaxes sobre este instrumento que representan as culturas tradicionais de practicamente todos os países europeos. Cada iconografía acompáñase dun texto, e todos xuntos van construíndo unha pequena historia da gaita de fol en Europa. Para a AGG resulta inadmisíbel que unha publicación editada con cartos de todos os galegos a través dunha institución pública sexa escrita en catro idiomas agás o galego. "A aldraxe para a nosa cultura chega por veces a extremos desconcertantes dende determinados estamentos que atacan a liberdade cultural", expoñen desde a asociación ao respecto deste caso.