Vieiros

Do home máis buscado do mundo, do mesmo que serviu de xustificación para comezar unha interminábel guerra en Afganistán, non se sabe nada. O secretario de Defensa de EUA, Robert Gates, admitiu nunha entrevista televisiva que os seus servizos de intelixencia non teñen pistas fiábeis do seu paradeiro “dende hai anos”.

Até o de agora, a crenza máis espallada é a de que o líder de Al Qaida se atopaba en territorio de Paquistán, nas proximidades da fronteira con Afganistán. A BBC asegura que un talibán detido recentemente afirmou ter noticias de que Ben Laden se atopaba nesa zona. Porén, o propio Gates non quixo darlle máis relevancia a esta declaración.

A semana pasada, un informe do Senado de EUA revelou que Ben Laden estivo a piques de ser capturado a finais de 2001 nas montañas de Afganistán. Porén, o documento é moi crítico coa estratexia seguida naquel momento pola Administración Bush, que non tería planificado ben a operación contra o líder de Al Qaida.

Morto ou vivo?
Durante o mandato de Bush, EUA afirmou varias veces que Ben Laden estaba morto. Porén, o propio líder de Al Qaida remitiu vídeos para desmentilo.

Un dos episodios máis polémicos sobre esta cuestión tivo lugar en novembro de 2007. A presidenta paquistanía, Benazir Bhutto, asegurou nunha entrevista á BBC que Bin Laden fora asasinado por Omar Sheik, un axente dos servizos de intelixencia de Paquistán. O fragmento de entrevista foi suprimido e provocou unha forte polémica.

• BBC: A busca de Ben Laden, paso a paso