Vieiros

O Observatorio Astronómico da USC, dirixido por José Ángel Docobo, está a investigar un fenómeno que se produciu o pasado luns pola mañá. Arredor das 8:08, un brillante bólido atravesou o ceo de Galiza, momento en que foi visto por moitas persoas.

O observatorio Ramón María Aller precisa recabar información sobre o paso do meteorito, polo que solicita a colaboración de todas as persoas que o observasen. Así, prega que as testemuñas se poñan en contacto co centro, a través do correo electrónico (joseangel.docobo@usc.es) ou chamando ao teléfono 981 592 747 entre as 11 e 14 e as 18 e 21 horas.

Aínda que estes fenómenos non acontecen todos os días, tampouco son infrecuentes. O anterior obxecto luminoso avistado no país aparecera o 28 de setembro. O Ramón María Aller precisa máis datos para saber a orixe, velocidade, traxectoria e o posíbel lugar de colisión do meteorito.