Vieiros

18 Rodas é o nome dun fanzine do que entre 1988 e 1998 saíron á luz once números. As súas páxinas estaban ateigadas de pop-rock de todo o mundo, con espazo para a actividade musical galega. Desde hai un ano o fanzine ferrolán está de volta, agora en internet, onde rescata vinilos dos 60 aos 90 de grupos de pop de Galiza, Europa e Estados Unidos.

A volta de 18 Rodas tivo un primeiro capítulo no festival XiriaPop de 2008, onde se regalou un cd-r no que aparecían os seis últimos números da revista en formato Pdf. En outubro dese ano, o fanzine iniciou unha nova etapa na rede en formato blog. Desde aí ofrece a posibilidade de acceder a vinilos fóra de catálogo convertidos a mp3. A listaxe de rarezas do pop non se queda só no ámbito anglosaxón: na listaxe aparecen grupos de Portugal, Italia, Francia, Holanda, Bélxica ou do Estado Español.

O pop-rock galego tamén ten o seu lugar no blog, que ofrece a oportunidade de escoitar gravacións difíciles de atopar en tendas. É o caso de discos de músicos dos 70 como Xoán Rubia, Mahía e Tara (coñecida como a Janis Joplin galega), grupos dos 80 como Los Cafres, Terminal Norte e La Rosa e tamén dos 90, como Cosecha Roja.