Vieiros

Ao igual que nos últimos once anos, a Mostra da Olería de Buño volve ter na Cocedura Tradional o seu momento máis destacado. A vixesimo sexta edición comezou o día 7 e chega á última fin de semana con dous días de artesanía e música no Forno do Forte da parroquia de Malpica.

A cocedura tradicional ponse en marcha o venres á mañá coa carga do forno, á que segue o seu encendido ás tres da tarde. A partir das nove da noite únese a música á celebración coa Festa da Carroa, na que actuarán os gaiteiros da Asociación Cultural “Malante”. Á mañá seguinte remata a cocedura ao sacar as pezas na descarga do forno. O sábado Buño acolle tamén unha exhibición de olerías tradicionais de Galicia, con pezas procedentes doutros centros oleiros importantes no país, como Bonxe, Niñodaguia e Gundivós.

Os que se acheguen a Buño poden participar das actividades diarias que se desenvolveron toda esta semana e que permanecen en funcionamento ata a noite do domingo: exposicións de olería, postos de venda dos oleiros e doutros artesáns como cesteiros e redeiras de Malpica, exhibicións do traballo dos oleiros, obradoiros para nenos e incluso unha feira que reproduce o ambiente en Buño no ano 1900, cando estaban en funcionamento máis dun cento de obradoiros na localidade.