Vieiros

• O PPdeG di que os socialistas son "ariete de Zapatero"
• O PSdeG acusa o presidente de "cinismo" e de mentir "por un bo titular"
• "Volveu sen honra nin diñeiro", repróchalle o BNG a Feijoo

Advertiu este xoves o presidente da Xunta durante a súa comparecencia no pleno extraordinario celebrado no Parlamento sobre a reforma do financiamento autonómico que non son aínda coñecidas as cifras finais que proporá para Galiza o goberno español. "Haberá que esperar ás reunións bilaterais para saber definitivamente o que nos corresponde", xustificou. Con todo, insistiu en que o modelo xa feito público "non está construído sobre bases sólidas". "Debemos esixir rigor fronte a improvisación, serenidade fronte a présa, transparencia fronte a ocultación, consenso fronte a imposición e igualdade fronte a privilexios para uns poucos", reclamou Alberto Núñez Feijoo dos grupos parlamentarios.

Asegurou o presidente que a Xunta adoptou unha posición de "responsabilidade" estabelecendo a abstención sobre o borrador achegado polo executivo estatal. Na opinión de Núñez Feijoo haberá tempo para "tratar de mellorar" un modelo que, no seu deseño actual, "responde aos intereses e urxencias partidarias dun goberno e non ás necesidades reais comunidades". "Sen unha base sólida, sen garantir os principios de igualdade e sen garantías de suficiencia está abocado a unha revisión en profundidade nun futuro próximo", agoirou.

Feijoo salientou especialmente que o modelo "abusa" da variábel de poboación, tanto no financiamento básico como nos chamados fondos adicionais. Recordou o consenso dos grupos parlamentarios en Galiza arredor da necesidade de aumentar o peso doutras variábeis xa que, independentemente de que máis poboación traia máis gasto, "tamén trae máis actividade e máis ingresos e en cambio, unha poboación avellentada ou dispersa só incrementa os custos de prestación dos servizos". Exemplificou o presidente da Xunta co caso dos 4.900 millóns de fondos adicionais dos cales a Galiza en principio só lle correspondería o 3% segundo o formato que pretende o goberno español. Laiouse ademais do rexeitamento de Madrid a que conten os máis de 300 mil residentes galegos no exterior.