Vieiros

Cada ano organizan un roteiro literario pola Lóuzara Xabreira de Fiz Vergara. Agora, da Agrupación Cultural Ergueitos abrollou a idea de converter o traxecto en parque escultórico en lembranza do vate e inspirado en poemas escollidos da súa obra con referencias xeográficas concretas do Val da Lóuzara.

Este luns coñecemos as primeiras pegadas da obra que, entre outros, adicarán a Fiz Vergara os artistas Primitivo Lareu, Fernando Yáñez ou Álvaro de la Vega. Achegámoslles ao respecto unha galería de imaxes. O vindeiro outono está previsto que se complete o traxecto artístico.

"Voz e imaxe asaltarán ao visitante deste roteiro no contedor museístico máis fermoso que ninguén puidese imaxinar", explican desde o colectivo, "o ceo, a auga do río e da Fonte da Cova e os soutos dos castiñeiros louzarinos serán as paredes, o teito e o chan dese museo aberto".

Como chegar:
Dende Samos, despois de pasar diante do Mosteiro e rodealo cóllese a saída en dirección a Triacastela. A 1 km. hai un desvío á dereita sinalizado: Lóuzara. A 8 km. sen desviarse chegamos a Aira Padrón (só hai unha casa-restaurante cara a esquerda e unha rotonda). É o primeiro punto do roteiro. Desde aí baixase cara o val de Lóuzara. O tempo estimado da camiñada é de unha hora e media.


A lista completa de lugares e artistas:

1. Aira Padrón. Primitivo Lareu  
2. Cruce de Foilebar. Xesús Otero-Yglesias  
3. Requeixo. Manuel Buciños  
4. Muíño de Locai. Álvaro de la Vega  
5. O Pedregal. Violeta Bernardo  
6. Altamira. Santalla Miguel Macía  
7. O Muíño Fernando Yáñez  
8. A Fonte da Cova Mónica Alonso  
9. Aira de Tesín Poy  
10. Pozo de Monteiro Caxigueiro  
11. Veiga de Fía Eduardo Valiña  
12. Augadalte Paco Pestana  
13. A Pedra do Río. Pozo de Beltrán Manuel Caamaño